就大埔宏福苑五級大火成立嘅獨立委員會今日（19日）舉行首場聽證會，下午嘅聆訊重點鎖定喺棚網阻燃問題，揭發嘅證據揭示承建商涉嫌知法犯法，更有監管機構人員疑「通水」之嫌。代表委員會嘅資深大律師杜淦堃陳詞指，有確切證據顯示，宏福苑承建商「宏業建築工程有限公司」明知合約訂明要用阻燃棚網，卻為咗慳皮改用廉價嘅非阻燃物料，更懷疑佢哋喺接受巡查時以「偷龍轉鳳」等手段蒙混過關。

杜淦堃喺庭上詳細闡述，宏福苑工程會議紀錄白紙黑字寫到明，外牆棚網必須採用具阻燃效能嘅物料，而業主立案法團同屋宇署代表亦曾多次口頭及書面提醒，警告承建商必須嚴格遵守安全標準，宏業對此絕對知情，無任何推搪餘地。案情指，經歷2025年兩次十號風球吹襲後，棚網受損需要更換，宏業期間多次指令二判「盈利豐棚業有限公司」向「林記建材」訂購新網。然而，「林記」嘅出貨紀錄顯示一個危險模式：除咗首批訂單係阻燃網外，其後大批訂購嘅全部係價錢較平、但完全唔具備阻燃功能嘅普通棚網。更令人震驚嘅係，「盈利豐」嘅證供直指，呢啲行為係跟從宏業嘅指示，當佢哋質疑會唔會違規時，宏業方面竟冷靜回應：「你訂阻燃網都唔會找數畀你」，圖利之心昭然若揭 。

除咗物料造假，文件同樣涉嫌造假。杜淦堃指出，宏業其後向勞工處提交嘅棚網阻燃證明，竟然係一份2024年發出嘅舊證書。問題係，除咗簽發該證書嘅檢測中心曾被質疑有問題之外，更重要嘅係呢張證書根本無法證明2025年新購入嗰批懷疑係非阻燃嘅棚網符合安全標準。更離譜嘅係，警方其後搜查宏業辦公室電腦時，發現有另一份證明文件草稿，但生產單位一欄竟然係留白，律師團隊強烈懷疑，呢份文件係為咗應付勞工處萬一追查而預先準備嘅「後備」假證 。

至於負責把關嘅房屋署獨立審查組（ICU），雖然曾就棚網阻燃情況進行多次檢查，但報告竟指「並未發現異常」。杜淦堃喺聽證會上即場播放咗ICU早前進行耐燃性測試嘅片段，踢爆真相。片段可見，工作人員取樣本進行燃點測試，當樣本離開火點後，竟然持續自焚近10秒，最後要由在場人士吹先熄滅。呢個情況明顯唔符合阻燃標準（一般要求離火自熄少於4秒），但奇怪嘅係，在場人員似乎對呢個明顯嘅不合格結果視若無睹，畀佢過關 。

聽證會上更爆出監管可能存在「走精面」嘅指控。杜淦堃披露，有WhatsApp紀錄顯示，ICU有人員竟然事先向承建商通風報信，預告會嚟測試棚網。更驚人嘅係，有證據顯示宏業員工曾喺內部群組發訊息，提醒同事「ICU聽日會嚟地盤巡，要Check定邊啲ok」。杜淦堃形容，呢種預先通知巡查時間甚至目的嘅做法，「問題顯然易見」，令人擔心承建商有機會做手腳。佢仲補充，有證據顯示ICU嘅檢查位置往往局限於大樓嘅底部及頂部，呢啲固定嘅檢查點，畀咗承建商機會預先更換「靚網」做樣，掩蓋大樓中部大量使用嘅非阻燃物料 。